Осомничен силувач и убиец на девојче најден мртов на пруга во Индија, откако политичар порача дека властите ќе го убијат без судење
Индиец осомничен за силување и убиство на мало девојче вчера е пронајден мртов на железничка пруга, два дена откако еден политичар најави дека властите ќе го пронајдат и ќе го убијат без судење, јавуваат локалните медиуми.
„Ќе го најдеме осомничениот и ќе го убиеме во средба“, изјави министерот за труд на индиската држава Телангана, Мала Реди, во вторникот.
„Ќе застанеме покрај семејството на жртвата. Ќе ги тешиме и ќе обезбедиме помош за семејството. Ќе го убиеме во „средба“. Правдата ќе биде задоволена“ рече Реди.
„Средба“ е израз кој во Индија се користи за убиство надвор од правосудниот систем.
Починатиот, 30-годишниот Палаконда Раџу, беше осомничен дека силувал и убил шестгодишно девојче минатиот викенд. Неговото тело го пронајде полицијата на железнички шини во близина на Хадерабад, а тој бил идентификуван по неговите тетоважи. Според шефот на полицијата во градот Хајдерабад, Анџани Кумар, можно е да се работи за самоубиство.
Телото на девојчето, пак, беше пронајдено во неделата, откако тоа беше исчезнато една седмица претходно. Обдукцијата покажа траги на сексуален напад, како и дека шестгодишната жртва била задавена. Случајот покрена серија протести, како и масовна потрага по Раџу, а полицијата понуди награда од околу 13.000 долари за информација која ќе доведе до негово апсење.
Произволните, вонсудски убиства, кои локално се нарекуваат „лажни средби“, стануваат сѐ почести во Индија. Според активисти за човекови права, извршителите често се од полицијата и од војската, а тие не одговараат за убиствата, кои се подведуваат под самоодбрана. Оваа пракса ја охрабруваат многу политичари, а таа се глорифицира во популарната култура и се оправдува во јавноста.