ВМРО-ДПМНЕ да ги одреди датумите за претседателските и за парламентарните избори ако претходно ги гласаат уставните измени, порача министерот за надворешни работи Бујар Османи. Во спротивно, тој додаде дека изборите ќе бидат во редовните термини.

-Ако ги изгласаат уставните измени ќе оставиме тие да одлучат кога ќе бидат изборите, кога и да сакаат денеска, утре, задутре, веднаш после изгласувањето на уставните измени. Мислам дека тоа е фер понуда од наша страна – рече Османи.

На прашање на кој датум би биле изборите доколку ВМРО-ДПМНЕ не ги гласа уставните измени, министерот одговори дека изборите ќе бидат во редовниот термин и дека партиите со консензус ќе одлучатдали тие да бидат споени или и на кој датум ќе се одржат.

-Во тој случај редовните термини треба да бидат земени в предвид и веќе станува прашање на технички, логистички пресметки во однос на одржување на изборите, отколку политичка проценка. Политичка процена е оваа понуда, нека ги изгласаат уставните измени, ќе оставиме тие да одлучат за денот на изборите, кога и да сакаат и за двата изборни циклуси и за претседателските и за парламентарните. Доколку не одиме на редовни избори, дали ќе бидат заедно или одвоени тоа е прашање на логистика, техника и проценка на партиите да најдеме консензус – изјави Османи.

Лидерот на ВМРО-ДПМНЕ Христијан Мицкоски вчера побара власта да одреди датум за двојни избори кои би се одржале помеѓу двата најголеми верски празници Велигден и Рамазан.

-Мора да се договори датум за редовни избори. Еве му еден предлог на Ковачевски. Нека земе бел лист хартија и нека напише кој било датум сака помеѓу двата најголеми верски празника идната пролет и да одржиме парламентарни и претседателски избори на еден трошок, рече Мицкоски.

 

Тој предупреди дека Владата преку одбегнување да се договори датум за избори, оди кон свесно предизвикување уставна и политичка криза“.

-Срамота е што преку медиуми се договараме и лиферуваме датуми за редовни избори. Разбирам кога велат дека Ковачевски никој не го слуша во Владата, зашто ниту министрите, вицепремиерите и кај него во партија му имаат почит. Затоа е оддаден на шетање по светот и компаниите. Но, мора да се договори датум за редовни избори. Ќе доживеат жесток пораз и тежок дебакл од народот. Народот треба масовно, во огромен број да им ја прати пораката на овие избори – нема играње со народот. Народот е посилен од секоја тесна клика и елита која си игра со судбината и ја одзема иднината. Доаѓаат промени. Заветот на Организацијата и поинаквите цели кои мора да ги оствариме се да ја кренема Македонија на здрави нозе – порача Мицкоски.