ФОТО | Инцидент на евровизиска проба: Мажи покажаа палестински симболи за време на настапот на Израел
За време на последните проби, непосредно пред почетокот на втората полуфинална вечер на Изборот на песна за Евровизија, се случил инцидент во публиката.
Имено, додека настапувала израелската преставничка, двајца мажи покажале забранети палестински обележја – знаме и марама која е позната и како „палестинка“.
Обезбедувањето веднаш им ги одзеде симболите и ги изнесе надвор од салата.
Забранети се палестинските симболи
Организаторите на Евровизија претходно објавија дека „го задржуваат правото да ги отстранат сите палестински знамиња и пропалестински симболи за време на натпреварот“.
Тоа значи дека е забрането внесување пропалестински симболи во салата, а надзорот се очекува да биде особено строг вечерва кога Израел ќе настапи во втората полуфинална вечер.
Мишел Роверели, менаџер за комуникации на Евровизија, додаде дека на посетителите им е дозволено да носат и истакнат знамиња што ги претставуваат земјите што учествуваат на настанот, како и знамето на ЛГБТ заедницата.
Илјадници луѓе протестираат во Малме
Пропалестинските и антиизраелските групи денеска организираа големи протести во Малме.
Шведската полиција проценува дека на пропалестинскиот марш во центарот на Малме присуствувале околу 8.000 луѓе, кои носеа палестински знамиња, тапани, свирчиња, звучници и факели.
Присутните извикуваа слогани од овој тип: „Ова е геноцид“, „Сите деца се еднакви“ и „Шведска, разбуди се!“.
Шведските медиуми јавуваат дека на протестите учествуваат граѓани од цела Шведска, но и од Данска, Франција и Португалија. Во протестната поворка има дури и семејства со мали деца и стари лица во колички.
Од полицијата велат дека засега нема инциденти.
Исто така, медиумите известија дека на протестот учествува и познатата активистка Грета Тунберг, која изјави: „Прекрасно е да се види дека овде има толку многу луѓе кои се залагаат за Палестина“.