Орбан го зголеми екстра данокот на добивка на МОЛ на 95 проценти

Виктор Орбан/ Фото EPA-EFE/STEPHANIE LECOCQ

Унгарската влада ја зголеми даночната стапка на дополнителната добивка на домашната компанија за гас и нафта МОЛ од 40 на 95 отсто и планира приходите да ги пренасочи за поддршка на граѓаните за трошоците за енергија, според официјални извори.

Одлуката беше објавена во средата доцна навечер во службениот весник. МОЛ заработува од разликата во цената меѓу руската нафта и онаа на лондонскиот пазар, а владата со подигање на даночната стапка на 95 отсто, практично ќе го земе целиот дополнителен профит во иднина. Даночната стапка е зголемена по втор пат. Летото владата го покачи од 25 на 40 проценти.

Во вторникот, на предлог на МОЛ, Владата предвреме го укина лимитот за цените на горивата поради недостиг предизвикан од намалениот увоз и паничното купување. МОЛ предупреди на критична состојба во снабдувањето со гориво поради наглото зголемување на побарувачката, додавајќи дека единствено решение е поголем увоз. Лимитот беше укинат околу три недели пред планираниот рок.

Премиерот Виктор Орбан во средата на својот Фејсбук профил изјави дека санкциите за руската нафта влијаеле на цените на бензинот низ цела Европа. „Во изминатите неколку дена стапија на сила бриселските нафтени санкции (за увоз од Русија – оп. ред.) и се случи она од што се плашевме“, напиша Орбан на Фејсбук.

Тоа значи дека цените на бензините се санкционирани низ цела Европа, тврди Орбан, пренесува Хина.

Видео на денот