Комуналните служби на Општина Карпош и јавните градски претпријатија, во текот на целата ноќ и утринава работат на отстранување на последиците од вчерашното невреме, поточно силниот ветер којшто достигна јачина и до 110 километри на час.

Се расчистуваат паднатите дрвја кои имаат блокирано улици, пешачки делови, како и влезови пред основни училишта и градинки.

-Со цел да се санира штетата, вработените во урбаните заедници ги мапираа критичните точки, направените штети и континуирано испраќаат информации до општинските сектори и градските претпријатија. Ги повикуваме заедниците на сопственици кои се соочија со поголеми штети (уништување на покриви или дел од покривните површини, фасади и сл.), да достават соодветно барање до Општината заради ублажување на последиците од штетите. Локалната самоуправа ќе обезбеди поддршка во рамките на своите можности и законски надлежности- велат од Општина Карпош.

-Комуналните служби се фокусирани на отстранување на паднатите дрвја од улици, патеки и влезови пред основни училишта и градинки. Стигнуваат пријави за паднати дрвја во повеќе населби. Етапно, ќе се расчистуваат сите. Ви благодарам на трпението и соработката, а посебна благодарност до работниците, кои цела ноќ и утринава се справуваат со последиците од невремето- напиша градоначалникот на Општина Карпош, Стефан Богоев.

Општината апелира до сите граѓани да бидат на безбедно, да водат сметка за околината и своите возила да не ги паркираат под повисоки дрвја.