Општина Аеродром: Градинката „Лале“ добива нов и модерен изглед
Градоначалникот на Општина Аеродром Тимчо Муцунски изврши увид во градежните активности на надворешниот дел од објектот „Лале“ кое е дел од градинката „Срничка“, информираат од оваа скопска Општина, од каде што објаснуваат и дека работите во моментот се одвиваат на надворешниот дел на објектот. Со оваа инвестиција е предвидено градинката да добие современ изглед, како и еколошка и енергетско-ефикасна фасада.
– Свесни сме дека нашата општина се соочува со недостиг на места по градинкитe, но наскоро и овој проблем ќе биде минато. Покрај градинката во Стар Аеродром која наскоро ќе почне со работа, нови градинки и доградба на постојните ќе има и на неколку други локации низ општината, а капацитетите на неколку градинки ќе бидат надградени и проширени – истакна градоначалникот Муцунски при увидот во градежните активности.
Во насока на кратењето на дополнителните трошоци кои ги имаат граѓаните,од Општина Аеродром потсетуваат дека од 1 март годинава, родителите беа ослободени од трошоците што ги издвојуваа за хигиенскиот пакет, и најавуваат дека, од 1 септември ќе бидат целосно укинати и сите трошоци што се издвојуваат за наставно-образовни материјали за работа по групи во градинките.
– Како една од најмладите општини во Македонија, Аеродром ја потврдува заложбата за континуирани инвестиции во воспитно-образовниот процес и најмладите. Продолжуваме да вложуваме во образованието и правиме сè за нашите најмлади – стои во соопштението од Општина Аеродром.