Од „Гласен Текстилец“ бараат навремени мерки за заштита на работниците од високи температури
Здружението „Гласен Текстилец“ апелира до Министерствата за здравство и за труд и социјална политика да објават препораки за намалување на ризиците од високите температури за лицата кои се наоѓаат на отворен простор и на своите работи места.
Предлагаме да дадат препорака за ослободување од работните обврски или да се организира работното време на најранливите групи на населението, како што се: бремените жени, лицата на возраст над 60 години, хронично болните. За градежните работници и сите други работници коишто работат на отворен простор да се организира работното време со цел за заштита од директна сончева изложеност на работниците, велат од „Гласен Текстилец“.
Здружението ги потсетува работодавците да го заштитат здравјето на вработените, а инспекторатот за труд да внимава на почитување на законските прописи од областа на безбедноста и здравјето при работа.
Од УХМР најавија дека следува период на стабилно и многу топло време со значителен пораст на температурата. Од среда земјата ќе влезе во активно портокалово ниво на опасност од високи температури, а во поголем дел од земјава, дневната температура ќе биде над 35 степени, а некаде ќе надмине и 40.