Објавен е новиот роман „Смртта не е крај“ на Владо Јаневски
Неодамна од печат излезе новиот роман на Владо Јаневски, „Смртта не е крај“, во издание на „Арс Ламина“, Скопје. Ова е негов петти роман.
Во претходниот, „Мртвите знаат најдобро“, добитник на наградата „Пегаз“, главниот лик, платениот убиец со уметнички аспирации, Фуриозо, живее и делува во Јапонија. Во „Смртта не е крај“ дејството се префрла во Австралија, каде што Фуриозо тргнува на долг пат на себеспознавање и разбирање на постоењето. Првите чекори на тој пат ги прави со неговите нови пријатели Пикасо и Шагал, кои го следат и разговараат со него или размислуваат гласно додека Фуриозо се обидува да започне нов живот. Како и во претходниот роман и овде реалноста и фантазијата се испреплетени низ многубројни изненадувања и интересни ликови.
Владо Јаневски е писател, сликар, илустратор, стрип-уметник, светски патник и до неодамна активен на полето за истражување и развој во водечка светска компанија. Роден е во Македонија, каде завршил високо образование на Универзитетот во Скопје. Од 1989 година живее во Сиднеј, Австралија.
Досега ги објави романите „Смртта не е крај“ („Арс Ламина“, Скопје, 2022), „Мртвите знаат најдобро“ („Арс Ламина“, Скопје, 2020), „Чудо зад аголот“ („Магор“ / „Пагома прес“, Скопје, 2020), „Под друга капа“ („Магор“, Скопје, 2019) и „Made in Jabana“ („Слово“, Скопје, 2004), како и збирката наградувани раскази „Нема враќање“ („Студентски збор“, Скопје, 1985).
Застапен е во книгата современи бајки „Детелинки-белинки“ („Арс Ламина“, Скопје, 2022), како и во антологиите „Современи кратки книжевни форми“ („Инаку“, Скопје, 2022), „Современи авторски бајки“ („Феникс“, Скопје, 2021) и „Песни за Скопје“ („Феникс“, Скопје, 2021).
Добитник е на наградата за најдобро сценарио за долгометражен игран филм на Меѓународниот фестивал на филмски сценарија „Скрипт фест“ 2021 за сценариото „Под друга капа“ и на наградата „Пегаз“ за најдобар необјавен роман на годината во Македонија за 2020 година, за романот „Мртвите знаат најдобро“. Повеќепати бил наградуван и на конкурсите за раскази на „Студентски збор“ и „Нова Македонија“.
(Текстот е објавен во „Културен печат“ број 145, во печатеното издание на весникот „Слободен печат“ на 10-11 септември 2022)
