Десетина дрвени куќички, во кои за претстојните празници веројатно ќе се продаваат најразлични дребулии, се поставени околу подната фонтана на плоштадот „Македонија“. Дали тоа е во рамките на најавата на градоначалничката Данела Арсовска дека и покрај тоа што го раскина договорот за новогодишно украсување, сепак скопјани нема да бидат тажни и ќе ја почувствуваат атмосферата – не се знае, затоа што од Град Скопје нема никаква информација.

Оттаму нема ниту известување дали нешто друго се планира за разубавување на плоштадот за Нова Година, дали ќе се поставуваат уште куќички, ќе има ли некаква забава барем за најмладите.

Новогодишните, а по нив и божиќните денови се највеселиот период во годината кога сите граѓани имаат посебно празнично расположение. Убаво би било и кога би знаеле дали Градот ќе понуди некаква содржина за да ја надополни празничната атмосфера.