Најдобриот играч во Евролигата не оди во НБА, потпиша нов договор со Ефес
Шејн Ларкин останува во турскиот тим, пренесува Еурохупс.
Според изворите на Еурохупс, најдобриот кошаркар во Евролигата потпиша двегодишен договор со Анадолу Ефес.
Ларкин кој на почетокот од оваа сезона доби и турски пасош, во договорот има клаузула која му овозможува наредното лето да си замине од Ефес доколку пристигне добра понуда од НБА лигата.
Одличниот бек за новиот потпис ќе добие вкупно 7.7 милиони долари, во првата година ќе инкасира 3.7 милиони долари, а доколку остане и во втората ќе заработи четири милиони долари.
Шејн Ларкин беше најдобар играч на Ефес и оваа сезона, просечно постигнуваше по 22 поени и имаше уште и четири асистенции и три скока на 25 натпревари во Евролигата.
Со овој потег Ларкин покажа дека нема намера да се враќа во НБА лигата доколку не добие поголема улога.
– Нема да се вратам во НБА за да бидам трет плејмејкер. Доколку некоја екипа е заинтересирана за мене, подобро да не се јавува доколку ми понуди вакво нешто – изјави Ларкин пред неколку дена.