Рафаел Надал во третото коло на Ролан Гарос го загуби првиот сет, но сепак „кралот“ на земјените терени го продолжува атакот на 12. титула на Ролан Гарос.

Надал за неполни три часа игра го победи Давид Гофан со 3:1 во сетови и тоа 6:1,6:3,4:6,6:3. Белгиецот успеа да го добие третиот сет откако направи брејк во деветтиот гем за 5:4 и потоа со сигурен сервис стана првиот тенисер кој на Ролан Гарос, годинава му зеде сет на Надал. Но тоа беше се што стори Гофан, одговорот на Надал дојде експресно со брејк на стартот по кој поведе со 4:1 и мирно го одведе мечот до крајот.

Освен Надал, сигурен настап имаше и Роже Федерер и тоа на јубилејниот 400. настап на Гран слем турнирите. Федерер во три сета со 6:3,6:1,7:6 за два часа и 13 минути го победи Норвежанецот Каспер Руд и се пласира во осминафиналето.

Кај дамите, поранешната победничка на Ролан Гарос, Гарбине Мугуруза во два сета со 6:3,6:3 ја победи Елена Свитолина, додека Лесиа Цуренко во маратонски меч кој се играше два дена беше поуспешна од Александра Круниќ. Одлучувачкиот трет сет, Цуренко го реши во своја корист со 11:9, откако првите два завршија со идентични 7:5.