Момче од Орешани уценувал познаничка со компромитирачки фотографии
Против уценувачот ОЈО поднесе обвинителен акт за кривично дело уцена.
Дваесет и двегодишен жител на скопското село Орешани се спаси од притвор, откако Основното јавно обвинителство го обвини за кривично дело уцена.
Според ОЈО, со намера да заработи пари уценувал 26-годишна познаничка дека за неа ќе открие, односно јавно ќе објави компромитирачки фотографии кои ќе и наштетат на нејзината чест или углед. Од жртвата тој побарал и добил 200 евра.
Надлежниот јавен обвинител до судијата на претходна постапка при Основниот кривичен суд Скопје достави предлог за определување мерки на претпазливост, односно забрана за напуштање на живеалиште/престојувалиште, обврска повремено да се јавува кај определено службено лице или надлежен државен орган, привремено одземање на патна или друга исправа за преминување на државната граница, како и забрана за приближување или воспоставување односно одржување контакти со оштетената.