Работната група за изготвување на новиот Кривичен законик е самостојна во своето работење и досега за ниту една одредба не е вршено влијание кај претседателот или членовите, соопшти денеска Министерството за правда откако утрово граѓанските организации од Блупринт групата за реформи во правосудството соопшти дека ја напуштаат работната група што го подготвува новиот Кривичен законик затоа што власта го злоупотребува нивното учество.

– Во однос на ставот на Блупринт сметаме дека не треба да се избрзува со постапките за предвремено излегување од работната група од причина што како што беше напоменато од страна на министерот за правда, Кренар Лога, работната група што го изготвува новиот Кривичен законик не учествувала во тие измени што се донесоа од страна на Собранието. Придонесот од граѓанскиот сектор е многу важен поради знаењето кое го има, долгогодишното искуство и вештините со кои располагаат – соопшти Министерството за правда.

Процесот на изготвување на новиот КЗ, додаваат, е целосно инклузивен и транспарентен и токму во таа насока е потребно да продолжи заради спроведување целосни реформи во казненото законодавство.

– Оваа обврска произлегува исто така и од билатералниот скрининг со ЕУ за донесување на комплетно нов КЗ усогласен со меѓународните стандарди – соопшти Министерството.