Претседателот на ВМРО-ДПМНЕ, Христијан Мицкоски во интервју за ТВ Клан истакна дека во новата година која повторно е изборна за државата, опозицијата ќе понуди план и решенија за излез од кризата. Тој смета оти постојат шанси, покрај локалните, да има и парламентарни избори, па затоа решенијата ќе бидат и на локален, но и државен план.

Тој вели дека оваа влада нема стратегија како да ја развива државата, секоја идеја на опозицијата се одбива, а за да може опозицијата да биде конструктивна треба и владата да биде таква.

– Не гледам креативност, не гледам стратегија, не гледам визија како понатаму. Се занимаваат со ситно политиканство, „купи ден – продај“ политики, но без некаква визија, како оваа држава треба да се справи со оваа криза што ја живееме, а потоа како да продолжи да се развива понатаму. За да опозицијата да биде конструктивна, треба да имате и конструктивна власт. Доколку власта не е конструктивна, вие не може како опозиција да сте конструктивни и да нудите решенија кои премногу надмено се отфрлаат и воопшто не се земаат во предвид за разгледување, потенцира Мицкоски.

Како пример за неконструктивноста на СДСМ, лидерот на ВМРО-ДПМНЕ, ја даде техничката влада каде секоја одлука на техничкиот министер за внатрешни работи, Наќе Чулев беше одбивана од владата.

– Сето она што дојде како предлог и идеја од опозицијата, беше одбиено од владата, за некои од предлозите по ден или два месеца да бидат прифатени и бидат претставени како предлози на владата. И таа бледа копија е добра отколку никаква. Улогата на опозицијата е да критикува, а опозицијата ќе понуди програма и решенија пред избори. Сега имаме локални избори, јас се надевам дека тогаш може да се случи пресврт и да имаме и парламентарни избори и врз основа на нашите анализи, ние ќе понудиме програма и како локално да ја развиеме Македонија и како да ја развиваме државата, нагласи Мицкоски.