Мицкоски: Историската вистина според источниот сосед била дека имаме бугарски корени, а Заев ништо не прави
Поминаа десетина часа од последната изјава на Захариева. Никаков одговор од официјалните власти од Македонија, напиша лидерот на опозицијата Христијан Мицкоски по изјавата на вицепремиерот и министер за надворешни работи на Бугарија, Екатерина Захариева, во интервју за Ројтерс, каде вели дека Бугарија бара признавање на историската вистина.
-Дел од медиумите дури пренесоа дека за да одиме напред треба да ја признаеме “историската вистина”. А историската вистина според источниот сосед била дека имаме бугарски корени.
Не е тоа вистина, туку политика. Проблемот е Заев кој не прави ништо да ја застапи нашата вистина, а таа непоколебливо говори дека Делчев е Македонец, македонскиот индентитет е наша посебност врз која имаме исконско право и европска иднина која ни ја должат- вели Мицкоски на Фејсбук.
-Дали би прифатиле нешто поинаку? Сега кажувам и нека остане за во иднина запишано… НИКОГАШ!- вели Мицкоски.