Мицкоски се сретна со Сарацин, разговарале за актуелните политички и економски состојби во земјава
Претседателот на ВМРО-ДПМНЕ Христијан Мицкоски и потпретседателот на партијата, Александар Николоски денеска се сретнаа со специјалниот пратеник на Сојузна Република Германија за Западен Балкан, Мануел Сарацин. Како што соопштија од партијата, во фокус на средбата биле актуелните политичко-економски состојби во земјава и предизвиците со кои се соочуваат граѓаните.
-Претседателот на ВМРО-ДПМНЕ Мицкоски истакна дека со последните измени на Кривичниот законик кој ги направи власта со европско знаменце всушност се подготвува за опозиција и директно ги амнестира своите кадри кои во ова гледаат начин да ја одбегнат правдата. Еден од најважните приоритети на идната Влада ќе биде борбата против корупција, се наведува во соопштението.
Мицкоски говорел и за проблеми на граѓаните, наведувајќи дека власта е далеку од споделувањето на европските вредности и цели.
На средбата се разговарало и за уставните измени, при што Мицкоски го потврдил ставот дека „оваа Влада нема легитимитет за таков чекор и дека прифаќање на бугарски диктат нема да се случи“.