Поранешниот германски репрезентативец, Лотар Матеус е убеден дека Ханси Флик за последен пат го предводеше Баерн Минхен во Лигата на шампионите, и на крајот од сезоната ќе го напушти баварскиот тим.

Причината за тоа е „војната“ помеѓу него и спортскиот директор Хасан Салихамиџиќ околу трансфер политиката на клубот во која тренерот сака да има поголема улога, а Матеус смета дека Флик на крајот од сезоната ќе си замине. Поранешниот капитен на Баерн и на германската репрезентација тврди дека наследник на Флик ќе биде најбараниот млад тренер во Европа, Јулијан Нагелсман од Лајпциг.  Актуелниот тренер на Баерн, од лето ќе биде нов селектор на Германија бидејќи Јоаким Лев по Европското првенство си заминува од функцијата.

– Ханси Флик ќе си замине на крајот од сезоната. Веќе постојат понуди од Германската фудбалска федерација и тој ќе биде идниот селектор. Баерн работи на тоа да го донесе Јулијан Нагелсман – изјави Матеус по испаѓањето на Баерн од ПСЖ.