Манчестер јунајтед новата сезона ја почна како што ја заврши претходната, со пораз од Брајтон
Точно три месеци откако Манчестер јунајтед беше понижен во последното коло од минатата сезона кога загуби со 4:0 од Брајтон, денеска во првиот натпревар од новата сезона, „црвените ѓаволи“ загубија од истиот тим на домашен терен.
Фудбалерите на Брајтон го приредија најголемото изненадување во првото коло во Премиер лигата и на „Олд трафорд“ славеа со 2:1 и му покажаа на новиот менаџер на Јунајтед, Ерик тен Хаг дека го чека „ѓаволски“ тешка задача да ја врати екипата во битката за трофеите.
Првото полувреме помина во апсолутна доминација на фудбалерите на Брајтон кој со головите на Паскал Грос во 30 и во 39 минута поведе со 0:2.
Во второто полувреме, Тен Хаг го внесе во игра и Кристијано Роналдо, сите карти ги фрли на напад но неговите играчи успеаја да дадат само еден гол. Всушност, во 66 минута Аргентинецот Алексис Макалистер си постигна автогол. Потоа Јунајтед имаше уште две големи шанси преку Маркус Рашфорд, но не успеа да постигне гол и му дозволи на Брајтон да ја оствари првата победа во историјата на „Олд трафорд“
Во вториот натпревар кој се играше од 15 часот, Лестер и Брентфорд ги поделија бодовите играјќи 2:2. Домашниот тим имаше водство од 2:0 по головите на Кастање и на Девсбери-Хол во 33. и 46. минута, но играчите на Брентфорд успеаја да го изегнат поразот благодарение на головите на Тони во 62. и на Дасилва во 86. минута.