Францускиот претседател Емануел Макрон  сака Европската Унија да го регулира увозот на пилешко и житарки од Украина и да дозволи пофлексибилни правила за одгледувањето во Унијата за да се смират протестите на француските земјоделци.

Претседателот информираше за време на официјалната посета на Шведска, а додека земјоделците ги паркираа своите трактори на автопатите во Франција и палеа сено делумно блокирајќи го пристапот до аеродромот во Тулуз.

Слични протести на земјоделците избија во повеќе европски земји, вклучувајќи ги Германија и Полска, пред изборите за Европскиот парламент во јуни, на кои се очекува поголем број гласови за десницата, за која селаните се сè поважно гласачко тело. Протести за февруари најавија и шпанските земјоделци.

Земјоделците во Франција, најголемиот земјоделски произведувач во ЕУ, велат дека не се доволно платени, дека се задушени од претераните прописи за заштита на средината и дека се соочуваат со нечесна конкуренција од евтиниот увоз.

„Што и да се случи, решени сме да одиме до крај“, кажа фармерот Жан Батист Бонгар, еден од толпата на автопат во близина на Париз.

„Ако движењето трае еден месец, тогаш ќе трае еден месец“, кажа Бонгар, кој ја преземал семејната компанија во јули и тешко му е да им конкурира на странските произведувачи кои не се оптоварени од истите прописи.