Јагнешкото месо во Бугарија за Велигден, ќе се увезува од Македонија. Причината е што неговата цена од таму е значително пониска од онаа што во Бугарија официјално се продава како домашно производство, како и од увоз, најчесто од Нов Зеланд, објави порталот Новините.

Јагнешкото месо традиционално е застапено на трпезата за Велигден и Ѓурѓовден, а повеќе од еден месец пред двата големи христијански празници неговата цена е иста како и минатата година, покажа проверката на „Телеграф.бг“. Но, причината за стагнацијата на цената е што во моментов нема реална побарувачка за јагнешко месо, а тоа ќе се случи кон средината на април. Засега бугарските земјоделци продаваат на големо по 10 лева (5 евра) за килограм жива тежина и 12 лева (6 евра) во малопродажба. Цената од кошарите до продавниците се удвојува, а таму килограм јагнешко се продава за околу 23-25 лева (13 евра). Сепак, се очекува дека неговата цена годинава во маркетите ќе достигне 30 лева (15 евра).

Во исто време, јагнешкото месо што се увезува од Македонија често илегално влегува на бугарска територија. Ова дополнително ја намалува неговата цена и такво месо може да се најде за помалку од 20 лева (10 евра) во продавниците. Според производителите, месото што доаѓа од нашиот југозападен сосед е замрзнато, но во продавниците се продава како разладено, што ги намалува цените на домашните јагниња. Во исто време, јагнешкото месо масовно се увезува од Нов Зеланд и се продава во големите трговски синџири.