Министерството за култура на Албанија финансиски не го поддржа одржувањето на Фолклорниот фестивал на македонското малцинство во Албанија, реагира македонското друштво „Илинден“ – Тирана. Друштвото смета дека треба да го добие проектот со оглед дека и минатата година не било финансирано од државата.

Претседателот Никола Ѓурѓај вели дека досега само еднаш добиле финансиска помош и тоа во 2019 година. Единствено бил објавен списокот на друштва кои добиле државни пари, каде нив ги нема. Меѓу 66-те проекти што ќе бидат финансирани, само еден е поднесен од Македонец.

– Од име на Македонците остро реагираме за несовесниот и крајно дискриминаторски однос на Министерството за култура, зашто сметаме дека треба да добиеме финансиска поддршка од државата за реализирање на проекти. Македонците се лојални граѓани и ги плаќаат сите даноци кон државата, но пари за нивните културни активности не добиваат – вели Ѓурѓај, претседателот на „Илинден – Тирана“.