Македонската естрада со настапи во мрак се обединува за Часот на планетата Земја
Часот на планетата Земја, глобалниот момент на солидарност за планетата ќе се одржи во сабота на 28 март. Во 20:30 часот по локално време ќе се затемнат над 8.000 градови во повеќе од 180 држави ширум светот, а меѓу нив е и Македонија.
Од канцеларијата на ова светско еколошко движење во Македонија најавуваат големо онлајн-дружење за време на едночасовниот еколошки мрак и велат дека на повикот за солидарност и обединување одговориле голем број пејачи и личности од македонската естрада, кои го прифатиле еколошкиот предизвик.
„Ги повикуваме граѓаните и сите наши поддржувачи да ни се приклучат на едно и полчасовниот спектакл на нашиот инстаграм-профил @earthhourmk, каде што ќе имаме можност заеднички да уживаме во настапите во мрак на нашите „Некст тајм“, ДНК, Антонија Гиговска, Иван Јованов, Огнен Здравковски, Теа Трајковска, а исто така ќе можеме да поразговараме и за климатските промени со Ване Марковски, Ирена Спировска, Татјана Алексиќ и многу други“, се наведува во најавата за настанот „Инстаграм лајв“ кој ќе почне во 20 часот, а светилките ќе бидат исклучени во 20:30 часот.
„Во овие тешки времиња, иако не можеме да се обединиме и да испратиме порака од улиците, сè уште можеме солидарно да се обединиме насекаде ширум светот, од нашите домови. Сега не е време да се откажеме, туку можност да реагираме уште покреативно“, велат организаторите на настанот.
