Македонска рок-сцена: Капитално дело за групата „Мизар“
Промоцијата на првата монографија за еден македонски рок-бенд ќе се одржи на 27 март во кафе-барот „Глуво куче“. Станува збор за монографијата „Мизар – Откровенија 1981-2021“ на музичкиот новинар Тошо Филиповски, кој ова капитално дело го објавува во едицијата „Македонски рок-архив“ во издание на „Корпус деликти рекордс“.
Монографијата се објавува во тврд повез со обвивка, целосно во колор на 333 страници и содржи повеќе од 200 фотографии, комплетна биографија и дискографија на бендот со сите снимени песни, фамилијарно стебло на бендот, анегдоти, сите концерти на „Мизар“, рачно испишани текстови, сет-листи, флаери, плакати, влезници, насловни страници и фото сесии, интервјуа на групата во списанија и весници, како и изјави и сеќавања на 50-ина музичари и новинари од целиот Балкан за еден од најзначајните македонски музички состави на сите времиња – „Мизар“.
– Монографијата „Мизар – Откровенија 1981-2021“ е мојот споменик кон еден бенд што со својата музика мошне сериозно влијаеше на мојот живот. Бенд чие музичко творештво, особено нивното дебитантско дело, е признаено како еден од епохалните музички албуми создадени на просторите на Југославија, на сите времиња. Тоа е бенд што македонскиот јазик во рок-музиката го извлече од заборавот разбивајќи ги стереотипите за негова неупотребливост во поетиката на една рок-песна.
– Со сите перформанси што „Мизар“ ги чинат легендарен бенд и со мојата лична опсесија со овој бенд, беше сосема очекувано првата монографија напишана за една македонска рок-група да биде токму монографијата посветена на „Мизар“ – истакнува приредувачот Тошо Филиповски.
Монографијата за групата „Мизар“ е четврто капитално дело од областа на македонската рок-музика на Тошо Филиповски, а се појавува по објавата на „Македонска рок-енциклопедија“, „Македонска дискографија – Винили 1958-2019“ и „Македонски рок-времеплов“.
(Текстот е објавен во „Културен печат“ број 122, во печатеното издание на весникот „Слободен печат“ на 26-27 март 2022)