Ливерпул и Арсенал на „Вембли“ за првиот трофеј во сезоната
„Редси“ и лондонскиот клуб имаат по 15 титули во Комјунити шилд пред денешниот дуел од 17.30 часот на „Вембли“ стадионот. На првото место е Манчестер јунајтед со 21 титула.
Тоа ќе биде натпревар помеѓу шампионот во Премиер лигата, Ливерпул, и освојувачот на ФА купот од минатата сезона, Арсенал. Менаџерот на „топчиите“, Микел Артета во дебитантската сезона дојде до трофејот откако во полуфиналето беше подобар од Манчестер сити (2:0), а во финалето и од Челси (2:1).
Воедно Арсенал на последниот дуел во првенството со 2:1 триумфираше над Ливерпул на „Емирати“.
– Не е идеално време за ваков дуел. Ливерпул започна со подготовките многу порано и одигра веќе два пријателски натпревари, додека ние имавме само неколку тренинзи. Од финалето на ФА купот помина малку време и тешко се задржува поголемиот дел од формата. Играчите се мотивирани и имаат можност да освојат уште еден трофеј – рече Артета.
Артета нема да може да смета на услугите на Мартинели, Чемберс, Мари и Мустафи, а се шпекулира дека во составот нема да биде ни напаѓачот Лаказет поради можен трансфер.
И Јирген Клоп има проблеми во тимот, ослабен со неиграњето на капитенот на Хендерсон, потоа Окслејд-Чемберлејн, Ориги и Шаќири, додека Ван Дајк би можел да почне од клупата поради расекотина од пријателскиот натпревар со Салцбург.
Во минатогодишното финале во ФА Комјунити шилд, Манчестер сити на пенали (5:4, регуларен дел 1:1) го совлада Ливерпул.