Куман: Мора да живееме со проблемите, ќе биде интересно со ПСЖ!
Тренерот на Барселона, Роналд Куман оцени дека двата натпревари од осминафиналето против ПСЖ во Лигата на шампионите ќе бидат интересни и убави за гледање.
И стратегот на парискиот клуб, Маурисио Покетино е свесен за тежината на овој двомеч, но и Аргентинецот верува во неговите играчи дека може да направат резултат кој ќе ги одведе во наредната фаза.
– Влегуваме во мечот со голем ентузијазам. Од самиот почеток знаеме дека ќе бидат тешки натпревари, бидејќи ПСЖ има силен тим. Барселона напредуваше во последните месеци, а ПСЖ има квалитет. Ќе бидат два интересни и убави натпревари – рече Куман.
Барса утре од 21.00 часот на „Камп Ноу“ се среќава со француската екипа во првиот меч, а говорејќи за Жерар Пике, кој се опоравува од повредата, Куман вели дека е добро и дека тренира со тимот четири-пет дена.
– Верувам дека може да игра, но имам уште еден ден да одлучам дали ќе биде во составот – додаде холандскиот стручњак.
Парижаните нема да можат да сметаат на Нејмар и Анхел Ди Марија во вторник, кои се здобија со повреди на препоните, односно на мускулите.
– Важно е за секоја екипа да ги има на располагање сите играчи. Ни недостасуваат Араухо, Серхио Роберто, Ансу Фати, Филипе Кутињо. Мора да живеете со тие проблеми и да подготвувате други играчи. Секој тим има предности и слабости, се надевам дека ќе ги искористиме утре – се зборовите на Куман.