Косовските специјалци и Србите се повлекоа од границата, распоредени се војници на КФОР
Специјалните единици на косовската полиција попладнево се повлекоа од административниот граничен премин Јариње кон Србија, а претходно од местото беше тргнат и камионот со билборд на кој пишуваше „Добредојдовте во Заедницата на српски општини“.
Тргнати се и шаторите во кои две недели престојуваа Србите кои го блокираа преминот, незадоволни од одлуката на Приштина да не дозволува влез на возила со српски таблички во Косово.
Патот Јариње-Косовска Митровица е деблокиран и прооден, јавуваат српските медиуми.
На деблокирањето на патот се чекаше до околу пладне, иако претходно беше најавено дека тој ќе биде прооден во осум часот утрово.
Утрово, според договор меѓу Белград и Приштина за смирување на тензиите на границаат, на преминот Јариње пристигнаа единици на КФОР, а војниците се распоредени во граничниот појас.