На три кола до крајот на сезоната поради пандемијата на коронавирусот дојде до прекин на футсал шампионатот во Македонија, а КМФ Проект од Јосифово веќе ја слави шампионската титула во Првата македонска футсал лига..

Футсал клубот на Шкупи не може да поверува на ваквата одлука, според нив сезоната треба до крај да се доигра и дека неправедно КМФ Проект Цико е прогласен за шампион.

– Скандал во домашната футсал лига. Со одлука на Владата, како и Фудбалската федерација на Македонија која не ги презеде плаќањата на ПЦР-тестовите за тимовите учесници во Првата футсал лига, официјално е прекината тековната сезона 2020/2021 година.

Со оваа одлука, моментално првиот тим на табелата, КМФ Проект Цико е неправедно прогласен за шампион, со оглед на тоа што до крајот на сезоната преостанаа уште три кола за одигрување, а згора на тоа во последното коло оваа екипа требаше да игра за титулата со актуелниот шампион Шкупи во Чаир.

Во оваа прилика, ние како клуб реагираме остро на оваа неправда, која на изненадување на сите љубители на спортот дојде со избрзана одлука на Владата, Фудбалската Федерација на Македонија, Министерството за здравство и Комисијата за инфективни болести, кои не дозволија шампионатот да продолжи дури и во услови кога се намалува бројот на заразени од ковид-19.

Понатаму, истата Комисија дозволи ракометни натпревари, кои исто така се играат во затворен простор, но не и натпревари во мал фудбал, сето тоа направено со една цел, да го спречи нашиот тим повторно да биде шампион. Оваа неправда ќе ја испратиме и до УЕФА, бидејќи веруваме дека правдата е на наша страна и дека истата ќе дојде до израз – стои во поголемиот дел од соопштението на Футсал клубот на Шкупи.