Не постои никаков документ, па ниту „нон-пејпер“ со кој Словенија би ги заговарала промените на границите на Балканот, е пораката која денеска словенечкиот премиер Јанез Јанша ја пренесе на членот на Претседателството на БиХ, Шефик Џаферовиќ.

Како што е соопштено од Претседателството на БиХ, Јанша во текот на денот го повикал Џаферовиќ за да ги објасни шпекулациите за наводниот документ со кој се заговара поделба на БиХ, но и промена на границите на другите држави во регионот. Слика од наводниот документ на англиски јазик беше објавена од еден словенечки портал, но без објаснување кој го составил и на кого е упатено.

„Претседателот на владата на Словенија, Јанез Јанша го извести членот на Претседателството на БиХ Шефик Џаферовиќ дека не постои „нон-пејпер“ кој би можел да се поврзе со владата на Словенија, а кој би вклучувал прекројување на границите или повреда на територијалниот интегритет на БиХ“, стои во соопштението доставено до медиумите од Претседателството на БиХ.

Истакнато е и дека Јанша пренел порака дека Словенија го подржува суверенитетот и територијалниот интегритет на БиХ, како и нејзиниот евроатлантски пат, притоа во целост почитувајќи го Дејтонскиот мировен договор.

Извор: Индекс.хр