Повеќе нема дилеми, Златан Ибрахимовиќ ќе потпише нов договор и ќе остане во Милан. Швеѓанецот на крајот ќе го добие тоа што го бараше, ќе има плата од 4.5 милиони евра и дополнителни и лесно остварливи 1.5 милиони евра во бонуси, со што ќе се израмни со голманот Донарума како најплатен играч на „росоњерите“.

Освен тоа, тренерот Стефано Пиоли кој се наоѓаше пред отказ, ја прероди екипата по тримесечната пауза и е награден со нов двегодишен договор, а згора на тоа доби ветување дека тимот ќе биде дополнително засилен.
Тоа што му беше ветено на несудениот негов наследник, Ралф Рангник, ќе го добие и Пиоли, тоа се околу 70 милиони евра за засилувања. Медиумите во Италија шпекулираат дека Милан целата сума ќе ја потроши за двајца играчи, Федерико Киеза и Никола Миленковиќ од Фиорентина.

„Виолетовите“ засега бараат 70 милиони евра само за Киеза, но свесни се дека ниту една екипа во светот нема да ја плати оваа сума и затоа се подготвени на отстапки.

Милан е подготвен покрај 70. милиони евра во Фиренца да го испрати Лукас Пакета и можеби младиот Калабрија во замена за Киеза и Миленковиќ и се чини дека оваа понуда е прифатлива за Фиорентина со што Милан во наредната сезона би бил еден од конкурентите за пласман во Лигата на шампионите, а можеби и ќе се вклучи во трката за титулата.