И кандидатот на ВМРО – ДПМНЕ за Бутел е осуден насилник
Разни обвиненија за криминал и криминалци се слушнаа во текот на изборната кампања за локалните избори во недела, па така и за Дарко Костовски, кандидатот за градоначалник на општина Бутел од редовите на ВМРО-ДПМНЕ излезе и пресудата со која е осуден на парична казна од 400 евра за нарушување на јавниот ред и мир.
Имено, според документот до кој дојде „Слободен печат“, тој во 2016-тата година во спортска сала во одморалиштето „Радости“ во Охрид физички нападнал прилепчанец, кој пак се здобил со телесни повреди од ударите и шлаканиците.
Тепачката започнала бидејќи Костовски се обратил со зборовите „Ајде да се тепаш со мене“, по што физички го нападнал прилепчанецот и го отстранил од салата. Сепак, кандидатот за градоначалник, а тогашен советник во Министерството за труд и социјална политика, одговарал единствено за нарушување на јавниот ред и мир според Законот за прекршоци.
Но Костовски пак, од друга страна како тренер е дел од успешната македонска експедиција на Летните олимписки игри во Токио, од каде таеквондистот Дејан Георгиевски се врати со сребрен олимписки медал.
Инаку, во предизборието се појавија информации и за други кандидати од ВМРО-ДПМНЕ кои имале криминално минато, но и го отслужиле своите казни.
Кандидатот за градоначалник на Гази Баба од ВМРО-ДПМНЕ, Бобан Стефковски во 2002 година бил фатен поради производство и продажба на 630 грама марихуана. Тој бил правосилно осуден со одлука на Апелација и отслужил казна затвор од 3 месеци.
Посериозно е делото на кандидатот за градоначалник на Долнени од ВМРО-ДПМНЕ, Ладо Глигороски кој во 1994 година, како вработен во полициското одделение во село Богомила претепал човек до смрт и бил осуден на затворска казна од 4 години и 6 месеци.