Ѓукановиќ: Указот за прогласување на закони го потпишав, дилемите останаа
Црногорскиот претседател Мило Ѓукановиќ го потпиша Указот за прогласување на закони што Собранието повторно го усвои на 20 јануари.
– Дилемите што ги имав и поради кои ги вратив во Собранието на повторно одлучување останаа. Со оглед на јасната Уставна норма од членот 94 кој гласи „Претседателот на Црна Гора е должен да го прогласи повторно изгласаниот закон“, нема простор за поинакво уставно постапување, наведе Ѓукановиќ на Твитер.
Притоа истакна дека е уверен оти со вкупна работа, особено во време на „комплексен амбиент на вршење на власта“, со апсолутно почитување на Уставот, најдобро придонесува за државата и за нејзиниот демократски напредок.
Ѓукановиќ додаде оти верува дека Уставниот суд, како единствена надлежна инстанца, ќе даде одговор на тоа прашање на независен и професионален начин.
Собранието на седницата на 20 јануари повторно ги усвои измените и дополнувањата на Законот за слобода на вероисповед со 41 глас „за“ од присутните пратеници. Повторно се усвоени и измените и дополнувањата на Законот за кредитни институции, измените на Законот за санација на кредитните институции и измените и дополнувањата на Законот за фискализација во прометот на стоки и услуги.