Груби: Промената на Изборниот законик не е дел од договорот помеѓу СДСМ и ДУИ за заедничко владеење
Пратеникот на ДУИ, Артан Груби, изјави денеска дека предлогот за една изборна единица не е дел од заедничката програма за владеење помеѓу нив и СДСМ.
Според него, овие измени не се предвидени со политичкиот договор помеѓу двете партии.
-Измените на овој Изборен законик не се дел од политичкиот договор за коалиционирање помеѓу СДСМ и ДУИ, врз база на која е и составена оваа владина коалиција, не е владина политика, не е владина програма за да се имплементира заеднички, туку е една иницијатива со обични пресметки за изборите на 12 април и не е смислена добро за доброто на граѓаните-истакна Груби.
Инаку пратеничката група на ДУИ, има поднесено над 5.000 амандмани на предлог – измените на Изборниот законик. Според нив, еднострано менување на правилата на игра пред да започнат изборните процеси е опасен преседан со кој би се соочило ова Собрание и политичката сцена во нашата држава.