Малку постигнувања и рекорди останаа во тенисот што Новак Ѓоковиќ не ги остварил. По освојувањето на Ролан Гарос тој стана тенисер со најмногу освоени грен-слем титули, вкупно 23. Тоа го прави најтрофејниот тенисер во историјата.

По победата во Париз, Србинот си наметна нова цел, а тоа е таканаречениот календарски грен-слем, односно освојување на четирите грен-слем турнири во една сезона. Тоа не му пошло одрака ниеднаш.

На добар пат е да го стори тоа. Годинава Новак ги освои Австралија опен и Ролан Гарос. Сега следува Вимблдон (3-16 јули), па потоа САД Опен (28 август-10 септември).

– Фактот што ги освоив последните четири титули на Вимблдон ми дава голема самодоверба. Навистина уживам да играм таму. Би сакал и да имам шанса да испишам историја во Њујорк. Малку ми недостигаше да го сторам тоа пред две години, но ме спречи Медведев. Едвај чекам да се вратам во Њујорк – вели Србинот.

Тој беше на еден чекор да оствари календарски грен-слем во 2021 година, но изгуби во финалето на САД Опен од Данил Медведев.

Досега календарски грен-слем во сингл успеале да остварат Дон Баџ (1938), Морин Коноли Блинкер (1953), Род Лејвер (1962, 1969), Маргарет Корт (1970) и Штефи Граф (1988).