Ѓоковиќ призна: Загрижен сум, не играм добро оваа година
Српскиот тенисер Новак Ѓоковиќ повторно не успеа да освои трофеј и беше поразен во полуфиналето на турнирот во Женева од Томаш Махач.
Ѓоковиќ се одлучи да настапи на турнирот со послаба конкуренција како подготовка за Ролан Гарос бидејќи доживеа рана елиминација и во Рим, па така немаше доволно натпревари на земјена подлога.
Дополнителен проблем за Ѓоковиќ може да биде повредата која ја заработи во овој меч, а можеше да се забележи и дека не е во најдобра физичка подготовеност. Самиот Новак по мечот не криеше дека е загрижен поради ситуацијата во која се наоѓа.
„Секако дека сум загрижен, не играм воопшто добро оваа година, освен на неколку мечеви. Работите се такви какви што се. Не се гледам како фаворит во Париз, ќе се обидам да одам чекор по чекор. Денеска се чувствував навистина лошо“, изјави Ѓоковиќ.
Во Франција прв противник на Ѓоковиќ ќе му биде Ербер од Франција. Ако нешто не се промени во формата на Ѓоковиќ тешко дека српскиот тенисер може далеку да стигне.