Џенаро Гатузо не е фан на долги договори и според италијанските медиуми одлучил да го одложи потписот за продолжување на соработката барем до наредната пролет.

42-годишниот тренер дојде како наследник на Карло Анчелоти минатиот декември и има важечки договор кој истекува во јуни 2021 година.

Ниту претседателот на клубот Аурелио Де Лаурентис не се брза во одлуката да се продолжи договорот на Гатузо кој успеа во минатата сезона заедно со македонскиот репрезентативец Елиф Елмас да го освои Купот на Италија.

Тема на денешниот состанок со Де Лаурентис и директорот Кристиано Гинтоли во Капри беа подготовките за новата сезона и плановите за евентуални нови трансфери.

Се најавува трансферот на Виктор Осимен од Лил за 50 милиони евра, воедно се бара замена за Хозе Каљехон, кој го напушта клубот по истекот на неговиот договор, а останува да се види кои желби ќе бидат исполнети од Де Лаурентис.

Гатузо ветува дека неговите играчи ќе се борат за врвот на Серија „А” и гарантира враќање во Лигата на шампионите.