Фудбалот не се враќа дома, Италија нов европски шампион
Фудбалерите на Италија се нови европски шампион откако во финалето на Европското првенство ја совладаа Англија на „Вембли“ и тоа по подобро изведување на пенали. Во пенал рулетот Италијанците беа подобри со 3:2 откако резултатот во регуларниот дел и по продолженијата беше 1:1.
Ова е втора европска титула за „Азурите“, прва по дури 53 години, додека Англија ќе чека следна шанса за да дојде до првата титула на континенталниот собир.
Херој на новиот европски шампион беше голманот Џанлуиџи Донарума кој ги одбрани пеналите на Џејдон Санчо во четвртата и Букајо Сака во петтата серија, додека непрецизен беше и Маркус Рашфорд. Кај Италијанците непрецизни беа Андреа Белоти и Жоржињо, но затоа погодија Берарди, Бонучи и Бернардески, додека за Англија погодија Мегваер и Кејн.
За време на регуларниот дел, Англичаните поведоа со најбрзиот гол во историјата на финалињата на Европските првенства, во втората минута погоди Лук Шо. Но, потоа Англичаните се повлекоа, се одлучија да го чуваат водството и таквата тактика се покажа погрешна бидејќи во второто полувреме Италија дојде до израмнување. Во 67 минута Леонардо Бонучи донесе израмнување на 1:1.
До крајот на регуларниот дел немаше посерииозни шанси па натгпреварот влезе во прдолженијата каде исто така нема ниту голови ниту шанси по што прашањето на победникот мораше да биде одлучен во пенал рулетот. Тука Донарума беше вистински херој бранејќи два пенали на Англичаните и и ја донесе втората европска титула на својата репрезентација.