ФОТО: Холанѓаните го празнуваат 27 април – Ден на кралот на Холандија
Денот на кралот е национален празник во Холандија и од 2014 година се празнува на 27 април, роденденот на кралот Вилем Александар. Во Холандија тоа е празник за и на народот, каде што славењето трае од раните утрински часови до доцна навечер, додека целата земја е во славеничко расположение и е обоена во портокалово, националната боја на Холандија и презимето на кралското семејство – Фан Орање.
Денот на кралот е неработен ден во земјата, со многу различни свечености, паради и музички и уметнички настапи. Кралот со неговото семејство и остатните членови на кралската фамилија секоја година посетуваат различен град и општина, каде што се одржуваат централните свечености и настани, патем поздравувајќи се и разговарајќи со народот и претставниците на локалните заедници.
Оваа година град домаќин на празникот е Ротердам во провинцијата Јужна Холандија, каде што кралот ќе ја започне својата церемонијална обиколка на градот прво поздравувајќи се со градоначалникот на градот, а потоа ќе продолжат со разни средби и манифестации во текот на денот.
Картите за сите свечености, како и јавниот транспорт низ градот овој ден се бесплатни и достапни за сите.
Државната телевизија врши директен пренос на настаните од почеток до крај.
Годинава кралот слави уште еден јубилеј – 10 години откако е дојден на престолот, по абдицирањето на неговата мајка, принцезата Беатрикс, во негова корист.
Кралот Вилем Александар и неговото семејство, кралицата Максима и нивните три ќерки се омилени кај холандскиот народ поради својата добронамерност, скромност и едноставност и нивниот ангажман и посветеност кон благосостојбата на холандската држава и нација.
Доколку имате прилика да се најдете во Холандија за време на овој празник, добрата забава и расположение ви се гарантирани.