ФИФА, фудбалерите и клубовите пред договор, платите се намалуваат за 50 проценти

Пандемијата на коронавирусот целосно ја запре економијата на многу држави низ светот, а ниту фудбалот не е изоставен од ова. Речиси сите фудбалски лиги во целиот свет се суспендирани до крајот на април, а тоа значи огромни загуби за екипите од ТВ правата, влезниците и продажбата на сувенири.

Поради тоа челниците на ФИФА, заедно со клубовите и унијата на професионални играчи работат на пронаоѓање решенија со кои би се намалиле загубите, а едно од првите е кратењето на платите.

Тоа сценарио веќе се случува, екипите од Премиер лигата донесоа одлука на фудбалерите да им исплаќаат 50 проценти помали плати се додека трае паузата поради коронавирусот, а тој тренд ќе го следат и останатите лиги.

Токму тоа е и апелот на првиот човек на ФИФА, Џани Инафантино по тричасовниот состанок со своите соработници со унијата на фудбалски екипи (ЕЦА) и со унијата на професионалните фудбалери (ФИФПро).

Сите три страни се согласија дека е неопходно итно да се прилагодат да новонастанатата состојба, да се воведат поригорозни мерки на штедење, а последниот предлог кој се очекува во најскоро време да биде усвоен е платите на фудбалерите да се намалат за половина.

Со тоа голем дел од екипите би се спасиле од неизбежен банкрот доколку не дојде до договор, а фудбалерите би почнале да ги добиваат целите плати кога ќе започне да се игра фудбал.

Видео на денот