Претседателот на Европскиот совет Шарл Мишел го повика новоизбраниот претседател на САД, Џозеф Бајден да дојде во посета на Брисел откако ќе стапи на должност и да ги врати во нормала трансатлантските односи, нарушени во претходните четири години, за време на актуелниот претседател, Доналд Трамп.

„Сега е време да ги здружиме силите. Во свет кој се менува, нашето партнерство ќе биде позначајно отколку било кога, за заштита на нашите граѓани и обнова на нашата економија, спречување на глобалното затоплување и создавање на побезбеден свет“, наведе Мишел во изјавата после денешниот телефонски разговор со Бајден.

Мишел додаде дека „ЕУ и САД секогаш ќе имаат поголемо влијание кога заеднички преземаат чекори“.

ЕУ често имаше изјави дека Трамп допринесува до влошување на односите меѓу двете страни, а сега се надева дека трансатлантските односи ќе можат да бидат вратени на нивото од времето на администрацијата на Барак Обама, кога Бајден беше потпретседател на САД.

Брисел и Вашингтон изминатите години имаа спор околу најважните прашања, од трговија и безбедност до борба против климатските промени.

Трамп најмногу ја разочара Европа со воведување на такси на увозот на роба од ЕУ и напуштање на Парискиот договор за климата и меѓународниот нуклеарен договор на големите сили со Иран.

Извор: Бета.рс