Поради пандемијата на коронавирусот и најдобрата кошаркарска лига на светот, НБА, се наоѓа во прекин. Како што веќе беше објавено, сега и одржувањето на традиционалниот драфт е под знак прашалник кој треба да се одржи на 25 јуни.

Екипите, односно тренерите, како и самите менаџери во НБА истакнуваат дека на кошаркарите ќе им треба најмалку еден месец за да се вратат во потребната натпреварувачка форма.

Моментно спортистите се наоѓаат во карантин со цел да се спречи ширењето на Ковид-19, но истовремено добиваат инструкции, програми од клубовите кои ги следат со цел физички да останат активни. Дел од играчите веќе го споделија своето размислување, со желба сезоната да заврши годинава и да се размислува за наредната, иако има и песимистички најави.

Се стравува дека и кошаркарите нема да имаат толку многу време пред евентуалното продолжување на шампионатот. Тие се сега на принудна пауза и немаат можност да работат во салите каде ги одржуваат воглавно тренинзите.

До прекинот на сезоната во Западната конференција водеше Лос Анџелес Лејкерс со учинок од 49 победи и 14 порази, а на Истокот составот на Милвоки Бакс (53-12).