Девојче пронашло заб од изумрена ајкула што постоела во праисторијата
Секој аматерски ловец на фосили сонува да пронајде праисториски и ретки фрагменти. Токму тој сон ѝ стана реалност на едно деветгодишно девојче, пишува „Би-би-си“.
Деветгодишната Моли Сампсон била на божиќно патување во Калверт Бич во сојузната држава Мериленд и ѝ кажала на нејзината мајка дека „ја бара Мег“.
Додека била во вода до колена, во еден момент го нашла токму тоа што го барала – заб кој ѝ припаѓал на мегалодон, изумрена ајкула што постоела во праисторијата.
Кураторот во локалниот поморски музеј го нарече „откритие што се случува еднаш во животот“.
Ајкулата мегалодон, што е старогрчки збор за „голем заб“, живеела во морињата ширум светот сè додека не изумрела пред околу три и пол милиони години.
Со должина од 20 метри, овој вид не само што бил најголемата ајкула во светот, туку и една од најголемите риби во историјата.
Забот што го пронашла Моли е долг 12 сантиметри, колку што е долга и раката на девојчето, вели нејзината мајка Алиша Сампсон, која веста ја објави на Фејсбук.
Нејзиниот сопруг уште од дете барал фосили во областа, а Моли пронашла повеќе од 400 помали заби. Никој од нив досега не нашол толку голем примерок.