Дачиќ: Нема да дозволиме српски жртви поради неподготвеноста на меѓународната заедница
Шефот на српската дипломатија Ивица Дачиќ за РТС изјави дека со месеци сме во ескалација поради неодговорното однесување на Албин Курти, кое предизвикува конфликтни ситуации.
Коментирајќи го пристигнувањето на КФОР пред општинските згради на северот на Косово, Дачиќ рече дека задача на КФОР е да го спречи едностраниот чин на Приштина, а не да ги спречи вработените да влегуваат во зградите.
„Сега ги штитат градоначалниците под изговор за зачувување на мирот. Изгледа ги штитат од сопствениците на зградите, Србите, од оние што работат таму, кои се вработени таму. Тие не можат да бидат градоначалници во српските општини кои не беа избрани од Србите“, рече Дачиќ.
Тој посочи дека вооружените сили на Србија се во состојба на готовност.
„Нема да дозволиме српски жртви поради неподготвеноста на меѓународната заедница и воениот авантуризам на Курти“, рече Дачиќ.