Бугарскиот претседател Радев во посета на Германија

Фото: МИА

Претседателот на Бугарија Румен Радев денеска заминува во посета на Сојузна Република Германија на покана на неговиот домаќин, претседателот Франк-Валтер Штајнмаер, соопшти прес-службата на бугарскиот претседател.

Како што јави дописникот на МИА од Софија, во понеделник, претседателот Радев во палатата „Белви” во Берлин ќе оствари „тет-а-тет” средба со својот германски колега.

По средбата ќе разговара со германскиот канцелар Олаф Шолц и со градоначалничката на Берлин, Франциска Гифаи.

Се очекува разговорите да бидат фокусирани на билатералните односи, продлабочувањето на економската и инвестициската соработка, како и на темите од агендата на Европската унија, диверзификацијата на снабдувањето со енергија и зајакнувањето на безбедноста на Европа во контекст на војната во Украина.

Радев ќе учествува и на Германско-бугарскиот бизнис форум во организација на Германската индустриска и трговска комора што ќе се одржи во Домот на германската индустрија во Берлин.

Шефот на бугарската држава на 17 мај во Хамбург ќе се сретне со премиерот на покраината Хамбург и со градоначалникот Петер Ченчер. Ќе има средба и со раководството на Стопанската комора во Хамбург, а ќе ја посети и компанијата „Аурубис АГ”, која развива активна економска дејност во Бугарија

Видео на денот