Најтешко погодениот регион подготвува нови мерки со кои се предвидува „кој ќе живее, а кој ќе умре“, пишува британски „Телеграф“. Според новите предлози на жртвите на коронавирус во Италија ќе им биде забранет пристап до интензивна нега ако се на возраст од 80 години или повеќе или со лошо здравје доколку се зголеми притисокот врз здравствениот систем. Ваквиот документ е доставен до единиците за управување со кризи во Торино.

Весникот пишува дека имал увид во протоколот според кој точно се знае кои пациенти ќе добиваат третман на интензивна нега, а кој не доколку има недостиг на сместувачки капацитети. Со оглед на моменталната ситуација во Италија каде вирусот се шири со огромна брзина земјата многу брзо ќе се соочи со недостиг на легла за критичните случаи.

Во документот, изработен од департментот за цивилна заштита од регионот Пиемонт, кој е еден од најтешко погодените, се вели: „Критериумите за пристап до интензивна терапија во случаи на вонредна состојба мора да вклучуваат возраст помала од 80 години или оценка на индексот за коморбидитет на Харлсон (што означува колку други медицински состојби има пациентот) помалку од 5. ”

Во документот исто така се вели и дека „Растот на епидемија предизвикува точка на нерамнотежа помеѓу клиничките потреби на пациенти со Ковид-19 и ефективна достапност на интензивни ресурси.

„Доколку е невозможно да се обезбедат услуги за интензивна нега на сите пациенти, ќе биде неопходно да се применат критериуми за пристап до интензивно лекување, што зависи од ограничените расположливи ресурси“.

Документот е веќе комплетен и потребно е само одобрување од техничко-научен комитет пред да се испрати во болниците. Ваквите мерки се очекува да се применуваат низ цела Италија, соопштија владини извори, пренесува британскиот весник.

Според податоците објавени од италијанските здравствени работници во земјата регистрирани се повеќе од 1.800 смртни случаи, а овој број секојдневно расте, имајќи предвид дека во моментов земјата се соочува со повеќе од 20.603 заразени.

Италија во моментов располага со 5.090 легла за интензивна нега. Земјата работи на создавање нови сместувачки капацитет во приватни клиники, старечки домови, па дури и во шатори. На земјата и се потребни и доктори, медицински сестри но и опрема.

Ломбардија останува најкритичен регион. Сепак, ситуацијата е сериозна и во соседен Пиемонт.