Браво, македонските ракометарки најдобри на ЕХФ шампионатот во Клаипеда
Денеска во големото финале на ЕХФ W17 шампионатот во Клаипеда (Литванија) македонската кадетска женска репрезентација го совлада Исланд со 27:26.
Во текот на првото полувреме двете репрезентации се менуваа во водство, во шестата минута Исланѓанките водеа со 3:1. Па, направивме серија од 4:1 за предност од 5:4 со погодокот на Младеновска во 13 минута од средбата.
Во понатамошниот период противничките повторно контролираа минимална позитива од еден гол разлика (6:5, 8:7), па ние се одвоивме на „плус два“ (11:9).
На паузата се замина со нерешени 12:12, а на стартот од вториот дел Торкелсдотир и Елиасдотир се погрижија за 15:13 за Исланд.
И во 44 минута ривалот имаше и 18:16, по што следуваше нова серија на погодоци нашите ракометни надежи од 5:1. Ризоска во 52 минута стрелаше за 21:19 за Македонија.
Од тој момент не дозволивме повторно да се врати противникот, константно држевме два голови разлика (22:20, 24:22), а на две минути до крајот сите дилеми победникот на турнирот ги реши Дукоска за 26:23.
Најефикасна на денешното финале во нашата селекција беше Дукоска со 11 голови, седум запиша Ризоска, а пет Коцева. Со овој успех У17 репрезентацијата обезбеди влез во елитата меѓу најдобрите 16 европски селекции.
ВИДЕО: Македонските кошаркарки го освоија трофејот на ФИБА „Челенџерот“ во Тбилиси