Теренс Флојд, братот на починатиот Џорџ Флојд, поради кој почнаа низа на протести ширум САД, им се обрати на сите оние кои предизвикуваат немири за време на протестите, велејќи дека ако тој ништо не крши и не уништува, тогаш зошто тие го прават тоа, додавајќи дека ништо од тоа нема да го врати неговиот брат или да го реши проблемот.

Теренс истакна дека неговото семејство е мирољубиво и ги повика сите да бараат промени по мирен пат и да гласаат на изборите.

– Јас не дојдов овде да дивеам. Не дојдов ништо да кренам во воздух. Не правам хаос во мојата заедница. Што правите вие? Ништо не правите. Затоа што ништо од тоа нема да го врати мојот брат – рече Теренс обраќајки се кон толпата луѓе околу него.

– Во секој случај на полициска бруталност се случува истото. Протестирате, уништувате работи и ништо не се случува затоа што тоа не се нивни работи. Тоа се наши работи. Тие сакаат да ги уништиме. Па ајде да го направиме ова поинаку – апелираше тој.

Теренс Флојд на луѓето што протестираа им посочи да престанат да мислат дека нивниот глас не е важен и да излезат на гласање, и тоа не само на претседателските избори, туку на сите избори.

– Едуцирајте се, знајте за кого гласате. Така ќе ги победиме, ќе промениме сè. Не чекајте друг да ви каже кој е кој, знајте за кого гласате и така ќе ги победиме. Во игра се многу пари, и нас не’ има многу. И секако ова ќе го сториме по мирен пат – рече Теренс Флојд.

Теренс истакна и дека знае дека неговиот убиен брат Џорџ не би сакал да се протестира насилно.

Исто така, неговиот пријател и свештеник Кевин Мекал изјави дека семејството ги моли демонстрантите да продолжат со протестите, но да продолжат мирно.

– Ова семејство бара мир. Ова семејство повикува на мир. Испраќам порака до сите луѓе во оваа земја да престанат со немирите. Подигнете знак на мирот. Силата е во бројките – апелираше свештеникот.