Американскиот државен секретар Ентони Блинкен ја предупреди Москва дека секоја повторена агресија врз Украина ќе предизвика „сериозни последици”.

Предупредувањето доаѓа во услови на зголемена загриженост на Западот од акумулацијата на руски војници во близина на украинската граница.

Зборувајќи денеска на прес-конференција во Рига, каде што присуствува на состанокот на министрите за надворешни работи на земјите членки на НАТО, Блинкен како „невообичаено” го оцени зголемувањето на руските војници и додаде дека „секоја ескалација на руската акција би била голема загриженост за САД”.

Теми на дводневната средба на министрите во главниот град на Летонија се дополнителната поддршка за украинската армија и потенцијалот за зајакнување на силите на НАТО распоредени долж источната граница на Алијансата.

Русија, која го презеде Крим од Украина во 2014 година и ги поддржува сепаратистите кои се борат во источна Украина, негираше дека планира напад и го обвинува НАТО за поттикнување тензии.

На состанокот на НАТО, Блинкен ќе ја нагласи силата на трансатлантските односи, континуираниот успех на НАТО во заштитата на трансатлантската заедница и посветеноста на американската администрација кон Алијансата и нејзините сојузници, се наведува во вчерашното соопштение на Стејт департментот.

Во соопштението се повторува дека посветеноста на САД на доктрината за колективна одбрана е „челична” и се забележува како Алијансата обесхрабрува и брани од широк спектар безбедносни предизвици, кои вклучуваат „ескалација на руската агресија”.

Сојузниците од собирот во Рига сакаат да му покажат на Кремљ дека ќе се соочи со големи последици доколку и се закани на Украина, без Москва да биде испровоцирана на натамошна агресија.

Извор: МИА