Најдобрите фудбалери ги завршија квалификациите на „историското“ трето место и веќе се фокусираат на новите настапи во Лигата на нации, иако до нив има уште нешто повеќе од четири месеци.

Потсетување во полуфиналето од плеј-офот дома ќе играме против Косово на 26 март 2020 год., а во втората полуфинална битка од Лигата „Д“ силите ќе ги одмерат Грузија и Белорусија.

Финалето е закажано за 31 март 2020 год., а како што најавуваат од УЕФА домаќинот на таа завршна битка ќе се дознае со ждрепка (22. ноември) од победниците во полуфиналните битки.

– Голема благодарност до сите кои учествуваа во квалификациите за Европско првенство 2020, играчите, стручниот штаб, медицинскиот тим и лицата задолжени за опремата како и лицата за обезбедување. Огромна благодарност до публиката и медиумите за поддршката. Само сите заедно сплотени можеме до крајната цел, ЕУРО 2020! МАКЕДОНИЈА СЕМЕЈСТВО!!! – напиша Ангеловски на Фејсбук.