Претседателот и врховен командант на оружените сили на Хрватска Колинда Грабар-Китаровиќ го пензионираше командантот на Хрватското воено воздухопловство, бригадниот генерал Мато Микиќ, по случајот со шверц на оружје во задарската воздушна база Земуник, јави Нова ТВ.

Телевизијата јави дека добила потврда дека е сменет и командантот на таа база, бригадир Марио Плеша.

Аферата избувна во хрватската јавност откако телевизијата откри дека воените пилоти прошверцувале и со хеликоптер превезле маж, осомничен за трговија со муниција.
Според Хина, Кабинетот на претседателката не сакал да одговори на прашањето за нејзините потези, но информираа дека за утре е предвидена прес-конференција на таа тема.

Вицепремиерот и министер за одбрана Дамир Крстичевиќ во петокот во Земуник изјави дека невојничкото однесување треба да биде санкционирано.