После сензационалната победа на стартот од Лигата на шампионите против Челси на домашен терен, Динамо Загреб в среда го очекува нов голем предизвик.

Играчите на тренерот Анте Чачиќ му гостуваат на Милан (18.45 часот) на стадионот „Сан Сиро“ на кој Аријан Адеми ќе прослави јубилеј.

Македонскиот репрезентативец против италијанскиот шампион ќе го има својот 100 натпревар во Европа во дресот на „модрите“. Далеку зад него на оваа листа е Самир кој запиша 76 натпревари.

Капитенот на хрватскиот клуб се наоѓа во одлична форма, а тоа доаѓа и како добра вест за селекторот Благоја Милевски пред репрезентативните обврски овој месец во Лигата на нации.

Во 99 настапи за Динамо во европските купови нашиот играч успеа да постигне 13 голови. Кога сме кај настапите, во редовите на Милан Оливие Жиру има 76 европски натпревари. Играчите на Динамо заедно имаат 802 натпревари, додека сегашните на Милан вкупно 382.